ብዙ ያልተነገረለት የአዲስ አበባ ቅርስ

ዛሬ ጥቅምት ፬ የኢትዮጵያውያን ወንድማማቾቹ አብርሃ ወ አጽብሃ (ኢዛና እና ሲዛና) የዕረፍታቸው መታሰብያ ነው። የነዚህን ኢትዮጵያውያን መታሰቢያ ቀን መሰረት በማድረግ ገድለ አብርሃ ወ አጽብሃ ላይ ስለተጠቀሰው በመሃል ሀገር በአዲስ አበባ ስለሚገኝ አንድ ኪነ-ሕንፃ ላውጋችሁ።

የዚህ ኪነ-ሕንፃ ምስረታ እና ታሪክ ወደ 4ተኛ ክፍለ ዘመን ያስጉዘናል። ሁለቱ ወንድማማቾች አብርሃ ወ አጽብሃ በስምምነት እና በአንድነት ሀገር በሚያስተዳድሩበት ግዜ ሰሜኑን አብርሃ ደቡቡን ደሞ አጽብሃ ያስተዳድሩ ነበር። አጽብሃ ታቦተ ሚካኤልን በማምጣት በአዲስ አበባ የካ ከአሁኑ ኢንግሊዝ ኢምባሲ ጀርባ ፍልፍል አብያተ-ክርስቲያን በመስራት አሰፈሩት። ይህንን ቤተ-ክርስቲያን በአሁኑ ሰዓት ዋሻ ሚካኤል በመባል ይጠራል።

ዋሻ ሚካኤል ኪነ-ሕንጻው ከላሊበላ ውቅር አብያተ-ክርስቲያን ጋር መመሳሰል ያለው ሲሆን ነገር ግን ከላሊበላ ውቅር አብያተ-ክርስቲያን ቀድሞ የታነጸ ነው። ዋሻ ሚካኤል ቤተ-ክርስቲያን ከ20 በላይ ምሰሶ ሲኖረው፤ በስተ ምዕራብ 7 መስኮት፣ በስተ ሰሜን 5 መስኮት፣ እንዲሁም በስሀ ደቡብ 5 መስኮት በአጠቃላይ ወደ 17 ሚገመት መስኮት እንዲሁም በተጨማሪ በስተ ምስራቅና ደቡብ በር እንደ ነበረው ይነገራል።

ይህ ውቅር ቤተ-ክርስቲያን በዘጠነኛው መቶ ክፍለ ዘመን በዮዲት ጉዲት ጉዳት የደረሰበት ሲሆን በሁለተኛው የጣልያን ወረራ (1929 - 1933) በቦንብ ጥቃት ሙሉ ለሙሉ ጣርያው ተደርምሷል። በአሁኑ ወቅት ጥቂት ምሰሶዎችና ግርጊዳ የቀሩት ሲሆን አሁን ላይ ከውድመት የተረፈውን ኪነ-ሕንፃ በመመልከት የቀደምት ይዘቱን በአያሌው መረዳት ይቻላል።

ኑ እና የቀደምት የኢትዮጵያውያን ኪነ-ሕንፃ በጋራ እንመልከት!

🗓 መስከረም 27/2016 ዓ/ም
📌 ዋሻ ሚካኤል፣ አዲስ አበባ፣ ኢትዮጵያ